Stori Siwgr a Sbeis

Mae Cymru'n enwog am ei chwedlau ond dyma stori dylwyth teg a ddaeth yn wir wrth i ddwy ferch o'r enw Rhian wireddu eu breuddwydion o sefydlu busnes llwyddiannus yn eu bro.   Ac yn Llanrwst, Dyffryn Conwy, y gwelsant eu cwmni, Siwgr a Sbeis, yn tyfu i fod yn un o'r prif gwmniau pobi cacennau cartref a melysfwyd yng Nghymru.

Mae pedair mlynedd ar bymtheg ers i Rhian Williams a Rhian Owen sefydlu Siwgr a Sbeis. Yn ffrindiau ysgol, aeth y ddwy i'r coleg i ddysgu pobi ac addurno cacennau cyn dechrau ar eu menter i werthu eu cacennau yn lleol.

Bellach, mae Siwgr a Sbeis yn un o gyflogwyr mwya'r ardal.   Mae gweithio i Siwgr a Sbeis yn brofiad cynhyrfus a heriol gan eu bod yn defnyddio dulliau traddodiadaol o goginio gyda ryseitiau sydd wedi bod yn y teulu ers cenedlaethau. Maent hefyd yn creu ryseitiau newydd a mentrus gan ddefnyddio'r cynhwysion newydd Cymreig gorau. Mae arbrofi gyda ryseitiau hen a newydd yn her barhaus a'r boddhad o lwyddo gymaint â hynny'n fwy melys.

Yr Arian Byw Y Tu Ôl i'r Llwyddiant

Mae'r ddwy Rhian yn dweud mai'r prif reswm dros sefydlu Siwgr a Sbeis oedd iddynt gael yr hyblygrwydd i greu busnes o gwmpas gofynion eu teuluoedd.

“Mae'r un gofal yn mynd i baratoi bwydydd Siwgr a Sbeis ag   sy'n mynd i baratoi bwydydd i'n teuluoedd,” meddai Rhian Williams.   “Pobi a choginio yw'n cariad cyntaf, ac rydym yn hyfforddi'n staff i gyd yn y dulliau traddodiadol.   Dyna gyfrinach ein llwyddiant.”

 

Y Prosiect Dynamo

Lansiwyd y Prosiect Dynamo gan Lywodraeth Cynnulliad Cymru i hybu entrepeneuriaeth a menter ymysg pobl ifanc Cymru. Mae'n rhoi cyfleoedd dysgu i ieuenctid fel rhan o Strategaeth Menter Ieuenctid ac Entrepeneuriaeth.

Fel rhan o rwydwaith Modelau Rôl y prosiect, rydym wrth ein bodd yn ymweld âg ysgolion a cholegau i ysbrydoli pobl ifanc a'u hannog i brofi'r wefr o fentro ym myd busnes.